ހދ. އަތޮޅު މަދަރުސާގެ 2019 ވަނަ އަހަރުގެ އިތުރު ޙަރަކާތްތަކުގެ އިފްތިތާހީ ޖަލްސާ ރޭ ބާއްވައިފިއެވެ.
އިފްތިތާޙީ ޖަލްސާގެ ޝަރަފްވެރި މެހެމާނަކީ ހދ. ވައިކަރަދޫ ކައުންސިލުގެ އިދާރާގެ ޑިރެކްޓަރ އަލްފާޟިލް މުޙައްމަދު ރަބީޢުއެވެ. މިޖަލްސާގައި ވަނީ ޕްރިފެކްޓް ބޯޑާއި ހިއްމަތްތެރި ދަރިވަރުންގެ ޖަމްޢިއްޔާގެ މަގާމްތަކަށް ހޮވުނު ދަރިވަރުންނަށް މަގާމްގެ ޒިންމާ ހަވާލް ކޮށްފައެވެ.
2019 ވަނަ އަހަރުގެ ޕްރިފެކްޓް ބޯޑަށް ހޮވިފައިވަނީ 40 ދަރިވަރުންނެވެ. އަދި ހިއްމަތްތެރި ދަރިވަރުންގެ ޖަމްޢިއްޔާއާއި ޖަމްޢިއްޔާގެ ދަށުން ހިންގާ ކްލަބުތަކުގެ އިސްމަގާމުތަކަށް 38 ދަރިވަރަކު ހޮވިފައިވެއެވެ. މީގެ އިތުރުން މިޖަލްސާގައި 2019 ވަނަ އަހަރުގެ ޕީޓީއޭ އިޢުލާންކޮށް މެންބަރުންނަށް މަގާމްގެ ޒިންމާ ޙަވާލުކުރުން އޮތެވެ.
ހދ. އަތޮޅު މަދަރުސާގެ 2019ވަނަ އަހަރުގެ އެކްޓިވިޓީ ކަލަންޑަރުވެސް ވަނީ ރޭގެ ޖަލްސާގައި އިފްތިތާހް ކޮށްފައެވެ. މިއަހަރުވެސް ދަރިވަރުންނަށް ފައިދާ ހުރި ގިނަ ޙަރަކާތްތަކެއް ހިންގުމަށް ކަލަންޑަރުގައި ހިމެނިފައިވެއެވެ. ރޭގެ ޖަލްސާގައި ވައިކަރަދޫ ކައުންސިލުގެ މެންބަރުންނާއި ރަށުގެ މުއައްސަސާތަކުގެ އިސްވެރިންގެ އިތުރުން މަދަރުސާގެ ގްރޭޑް 4 އިން މަތީގެ ދަރިވަރުންނާއި ދަރިވަރުންގެ ބެލެނިވެރިން ބައިވެރިވެފައިވެއެވެ.
